FrieslandCampina incrementará en setembro en 1,50 euros o seu prezo garantido para o leite convencional, que se situará en 44 euros por cada 100 quilogramos. Trátase da segunda suba consecutiva, despois do aumento de 1,25 euros rexistrado en agosto, e supón alcanzar o valor máis alto no que vai de 2026.
A cooperativa explica este incremento pola previsión de que os prezos do leite nas empresas de referencia do noroeste de Europa manteñan unha tendencia á alza durante o próximo período, así como por unha corrección correspondente ao período anterior.
Pola súa parte, o prezo integral do leite alcanza en setembro os 47,71 euros por cada 100 quilogramos, fronte aos 46,21 euros de agosto. Este importe calcúlase a partir do prezo garantido, ao que se engaden a bonificación máxima Foqus planet por sostibilidade e a prima por volume, unha vez descontadas as retencións e os custos correspondentes. O valor da proteína sitúase este mes en 614,35 euros e o da graxa en 491,48 euros por cada 100 quilogramos. O cálculo realízase cunha relación fixa 5:4 entre proteína e graxa e sobre un leite estándar con 3,57 % de proteína e 4,49 % de graxa, sen IVE, para unha subministración media anual de 1.000.000 de quilos. O prezo garantido medio nos nove primeiros meses do ano alcanza os 41,11 euros/100 kg.
