Caixa Rural Galega inaugurou este luns unha nova oficina en Carballo, situada na rúa Desiderio Varela, 6, coa que alcanza as 49 oficinas en Galicia. A apertura reforza a presenza da entidade na provincia da Coruña e coincide coa celebración do seu 60 aniversario.
A nova sucursal contará inicialmente cun equipo de tres persoas e nace coa vocación de ofrecer un servizo financeiro de proximidade adaptado ás necesidades de familias, autónomos, explotacións agrarias, pemes e empresas da comarca de Bergantiños.
O acto inaugural contou coa participación do director xeral de Caixa Rural Galega, Jesús Antonio Méndez Álvarez-Cedrón; do presidente da entidade, Manuel Varela López; do alcalde de Carballo, José Daniel Pérez López, e da deputada provincial responsable da área de Infraestruturas Viarias e Obras Provinciais, Mónica Rodríguez Ordóñez.
Durante a súa intervención, Manuel Varela destacou o compromiso de permanencia da entidade e sinalou que esta nova apertura busca dar resposta ás necesidades dos veciños e do tecido económico da comarca. Caixa Rural Galega mantén así a súa aposta por un modelo cooperativo baseado na proximidade e no apoio aos sectores produtivos galegos.
