Timac Agro lanza ao mercado Carbon Neutral, a primeira gama verificada de fertilizantes neutros en CO₂e, que reducirá ata un 75 % das emisións xeradas polo cultivo.
Trátase dunha nova gama neutra en carbono dos fertilizantes sólidos especiais RHIZOVIT PROCESS, D-CODER TOP e SULFAMMO N-PRO, que xa acumulan máis de 1,3 millóns de toneladas vendidas a máis de 28.000 clientes.
A nova liña Carbon Neutral está deseñada conforme aos requisitos das normas ISO 14067, de pegada de carbono de produtos, e ISO 14068, de plan de neutralidade climática de produto, coa verificación da entidade externa acreditada EQA.
Para acadar esta gama con pegada de carbono cero, aseguran desde a compañía que activaron mecanismos de redución de emisións de CO₂e en todo o ciclo de vida do fertilizante, desde a obtención das materias primas ata as emisións no campo.
As medidas de mitigación aplícanse nas actividades 'auga arriba', coa compra de materias primas baixas en carbono; na fabricación, empregando exclusivamente fontes de enerxía renovable; e nas actividades 'auga abaixo', coa aplicación de tecnoloxías propias que reducen as emisións de óxido nitroso e aumentan a eficiencia no uso dos nutrientes.
"Este procedemento permítenos abordar a descarbonización dos produtos dun xeito integral, acadando altos porcentaxes de redución", aseguran desde Timac Agro. En canto ás emisións residuais que non se poidan mitigar, indican que serán compensadas con créditos de carbono de alta calidade.
