A Subdirección Xeral de Producións Gandeiras e Cinexéticas, dependente da Dirección Xeral de Producións e Mercados Agrarios do Ministerio de Agricultura, Pesca e Alimentación, vén de publicar o Informe de Declaracións de Entregas de Leite Cru aos Primeiros Compradores correspondente ao mes de febreiro, no que se rexistra un prezo medio do leite en España de 0,495 €/litro, exactamente igual ao mes anterior.
En canto ao volume de produción mensual, o documento reflicte un importante descenso. No primeiro mes do ano declaráranse 625.565 toneladas, mentres que en febreiro a cifra reduciuse ata as 578.931 toneladas.
As comunidades autónomas que fixaron o prezo máis alto en febreiro foron Canarias (0,633 €/litro), País Vasco (0,536 €/litro) e Asturias (0,523 €/litro). Pola contra, as cifras máis baixas corresponden a Navarra (0,495 €/litro), Galicia (0,472 €/litro) e Illas Baleares (0,466 €/litro).
