A primeira poxa de Fonterra de outubro viviu un lixeiro descenso no índice global de prezos dos produtos lácteos, situándose en 3.921 $/tonelada, o que supón un -1,6 % con respecto á anterior poxa.
Dentro deste contexto, o queixo cheddar segue a incrementar o seu valor, ao igual que nas últimas poxas. Nesta ocasión, a subida é dun 0,8 %, alcanzando a cifra de 4.858 $/tonelada.
Por outra parte, descende o prezo do leite desnatado en po (-0,5 %), o leite enteiro en po (-2,3 %) e a manteiga (-3,0 %), anotando prezos de 2.599 $/tonelada, 3.696 $/tonelada e 6.712 $/tonelada, respectivamente.
A caída máis acusada observouse na mozzarella, ao igual que na anterior poxa. Nesta ocasión, o seu valor descende un -11,8 %, quedándose o seu prezo en 3.393 $/tonelada. Pese a este axuste, o valor medio dos derivados do leite segue sendo superior ao observado nestas mesmas datas o ano pasado.
