A industria láctea FrieslandCampina, dos Países Baixos, fixo público o prezo garantido do leite os seus produtores, que nesta ocasión sofre un lixeiro descenso respecto ao mes pasado, despois de moitos meses consecutivos de subas. A baixada é de 1,35 euros por cada 100 quilogramos de leite, garantindo un prezo de 56 €/100 kg.
Cómpre destacar que o prezo integral do leite para xaneiro inclúe, por primeira vez, un bono por cantidade de 0,50 euros por cada 100 quilogramos de leite, aplicable a entregas de 1,5 millóns de quilogramos de leite ou máis ao ano. Este bono págase mensualmente por adiantado xunto co pago do leite. O prezo integral do leite en xaneiro queda en 59,21 €/100 kg.
O prezo garantido aplicarase aos 100 kg de leite con contidos estándar de 3,58 % de proteína, 4,45 % de graxa e 4,53 % de lactosa, sen IVE. As cantidades aplícanse a un subministro medio de 925.000 quilos de leite anuais. O valor da proteína este mes é de 855,40 euros por 100 kg e o da graxa de 570,26 euros por 100 kg.
