A Subdirección Xeral de Producións Gandeiras e Cinexéticas, dependente da Dirección Xeral de Producións e Mercados Agrarios do Ministerio de Agricultura, Pesca e Alimentación, vén de publicar o Informe de Declaracións de Entregas de Leite Cru aos Primeiros Compradores correspondente ao mes de abril, no que se rexistra un prezo medio do leite en España de 0,501 €/litro. Este valor supón un lixeiro incremento respecto aos tres primeiros meses do ano e é superior ao fixado en abril de 2024, que foi de 0,488 €/l.
En canto ao volume de produción mensual, o documento reflicte un descenso respecto ao mesmo período do ano pasado. Mentres que en abril de 2024 se declararon 648.141 toneladas, no de 2025 a cifra apenas alcanzou as 641.352 toneladas. Deste xeito, abril de 2025 converteuse no cuarto mes consecutivo no que descende a produción de leite en España.
As comunidades autónomas que marcaron o prezo máis alto en marzo foron Canarias (0,633 €/litro), Euskadi (0,533 €/litro) e Asturias (0,521 €/litro). Pola contra, os valores máis baixos corresponderon ás Illas Baleares (0,465 €/litro), Galicia (0,489 €/litro) e Cataluña (0,495 €/litro).
