O Fondo Español de Garantía Agraria (FEGA) acaba de facer público o informe de entregas de leite correspondente ao mes de setembro de 2021, no que se rexistra un novo ascenso do prezo medio no conxunto do país. A cifra en agosto estaba en os 0,338 €/litro e en setembro sitúase nos 0,342 €/l. A pesar do incremento destes catro últimos meses, o prezo medio continúa sen chegar aos 36,76 €/100 kg rexistrados en Europa no mesmo período.
Por comunidades autónomas, alcanzan os prezos máis elevados Canarias (0,425 €/l), País Vasco (0,367 €/l), Andalucía (0,361 €/l) e Asturias (0,353 €/l). No outro extremo sitúanse Galicia (0,333 €/l), A Rioxa (0,338 €/l) e Baleares (0,339 €/l).
Este incremento segue sendo insuficiente polo incremento dos custos de produción, así polo menos considérano os gandeiros e as principais asociacións do sector, que xa teñen convocadas diversas manifestacións para os próximos días. Este xoves terá lugar a primeira delas en Lugo, convocada por Agromuralla; o martes 9 seguirá outra en Zamora, ás portas de Lactalis, organizada por Asaja, COAG e UPA; o xoves 11 celebrarase a seguinte diante de Lactalis, en Vilalba, convocada por Unións Agrarias, e o martes 16 haberá outra, tamén citada por Unións Agrarias, diante de Capsa, en Outeiro de Rei.
