A V Feira Profesional de Maquinaria, Agricultura e Gandería, Abanca Cimag-GandAgro 2025, terá lugar desde este xoves ata o sábado na Feira Internacional de Galicia Abanca, no municipio pontevedrés de Silleda.
En total, estarán presentes 508 firmas de 26 países, das cales 174 son expositores directos e 334 son marcas representadas. Esta cifra supón un incremento dun 20 % respecto á pasada edición, en 2023.
A feira estenderase polos dous pavillóns principais do recinto, unha gran carpa anexa ao pavillón 2, que acollerá as ganderías de vacún frisón, e tamén en boa parte do paseo central. A superficie bruta ocupada alcanza os 26.000 metros cadrados.
A pesar de que as portas xa abren este xoves, o acto oficial de inauguración levarase a cabo o venres ás 12:30 horas, presidido pola conselleira do Medio Rural da Xunta de Galicia, María José Gómez.
Conferencias, concursos e demostracións
Respecto ás actividades do certame, contará con multitude de propostas de gran interese para gandeiros, agricultores e outros profesionais do sector. Entre outros temas, analizaranse a distribución sostible de purín, a optimización de datos nas granxas de vacún de leite e os proxectos Sat4carbón, de monitoreo de carbono en sistemas silvopastorais por teledetección, e Bio4trace, que, baseado en biotecnoloxía avanzada, busca salvagardar as razas autóctonas porcinas. Ademais, a Consellería do Medio Rural realizará unha xornada informativa para a incorporación de mozos e novos agricultores ao rural e outra centrada en sanidade animal.
Os concursos tamén terán a súa relevancia na feira. Organizados pola Fundación Semana Verde de Galicia e a Federación Frisona Galega (Fefriga) co apoio da Consellería do Medio Rural, desenvolveranse os morfolóxicos XXXVII Open Internacional e XXXIII Autonómico da Raza Frisona, con participación de 159 exemplares de Galicia, Cantabria, Asturias, Cataluña e Portugal; o XX Concurso Internacional de Preparadores de Gando e o XLII Concurso de Xóvenes Manejadores.
