A compañía Nestlé organizou en SAT Doroña, en Arzúa (A Coruña), unha visita institucional para dar a coñecer as actuacións que vén desenvolvendo xunto ás ganderías galegas que lle subministran leite. No encontro participaron o presidente da Xunta de Galicia, Alfonso Rueda; a conselleira do Medio Rural, María José Gómez, e o director xeral de Nestlé España, Jordi Llach, ademais de representantes de entidades colaboradoras da compañía.
Durante a xornada, Nestlé deu a coñecer que desde 2021 investiu preto de 4 millóns de euros en máis de 60 das 83 granxas coas que traballa en Galicia. As actuacións dirixíronse a reducir emisións, mellorar o benestar animal e fomentar a agricultura rexenerativa e a biodiversidade. A este investimento súmanse preto de 1,5 millóns de euros aboados desde 2023 en concepto de prima económica sobre o prezo do leite ás ganderías que implantaron este tipo de medidas.
A explotación visitada, SAT Doroña, é unha das provedoras da fábrica de leite condensado La Lechera de Pontecesures (Pontevedra). Durante o encontro, Raúl Varela, fillo dun dos propietarios da granxa, explicou algunhas das medidas adoptadas nos últimos anos para reducir o impacto ambiental da granxa, favorecer a biodiversidade e mellorar o benestar dos animais.
Entre as actuacións desenvolvidas nas ganderías provedoras figuran a instalación de placas solares, o recubrimento de fosas de xurro, a incorporación de ventiladores, teitos illantes, humidificadores e cepillos mecánicos, ademais de distintas medidas vinculadas ao manexo do solo e dos cultivos.
Segundo os datos facilitados por Nestlé, as arredor de 55 granxas galegas que participan desde 2021 no seu proxecto coa Fundación Global Nature reduciran a finais de 2025 as súas emisións en máis de 41.000 toneladas de CO₂ equivalente respecto a 2018.
