A Asociación Nacional de Especialistas en Medicina Bovina de España (Anembe) celebrará do 26 ao 28 de maio de 2027 en Palexco, A Coruña, a vixésimo novena edición do seu Congreso Internacional de Medicina Bovina. A cita volverá reunir profesionais e especialistas do sector arredor dos principais avances, retos e liñas de evolución da profesión.
Anembe acaba de presentar o cartel desta nova edición, unha proposta construída arredor da letra A, en referencia tanto á propia asociación como á Coruña. O deseño parte ademais da evolución histórica desta letra, cuxa orixe se atopa nun antigo xeroglífico exipcio que representaba unha vaca e que, a través de distintas civilizacións, evolucionou ata adquirir a súa forma actual.
A imaxe incorpora tamén diferentes elementos relacionados coa Coruña. A A convértese na Torre de Hércules e, baixo ela, un cranio de vaca substitúe o do xigante Xerión nunha recreación do escudo da cidade. Anembe lembra ademais a presenza do gando bovino en varios dos traballos mitolóxicos de Hércules, como os establos de Auxías, o touro de Creta e o gando de Xerión. No centro do cartel aparecen unha rubia galega e unha vaca frisona, protexidas pola A.
Baixo o lema “Veterinaria que evoluciona, profesión que transcende”, o cartel alude tamén ao presente e ao futuro da profesión. Segundo explica Anembe, no Congreso danse a man “a experiencia e novas maneiras de ver a profesión”, mentres que o encontro se representa como un faro que “ilumina o camiño e marca a dirección a seguir”.
