O pasado xoves pola tarde, a Dra. Azucena Mora, catedrática de microbioloxía na Facultade de Veterinaria de Lugo e recoñecida polas súas investigacións sobre Escherichia coli (E. coli), tomou posesión da cadeira n.º 21 da Academia de Ciencias Veterinarias de Galicia. A cerimonia, celebrada no salón de actos da Deputación Provincial de Lugo, coincidiu coas vésperas do Día One Health, que se conmemora o 3 de novembro, e precedeu á Semana de Concienciación sobre a Resistencia aos Antimicrobianos.
Durante o seu discurso de toma de posesión, a Dra. Mora abordou un dos desafíos máis apremantes para a saúde global: a resistencia aos antibióticos. Desde a perspectiva One Health, que conecta a saúde humana, animal e ambiental, Mora destacou a interdependencia destes ámbitos e afondou na importancia da loita contra as bacterias multirresistentes, ao tempo que puxo de relevo a necesidade dun enfoque integral para facer fronte a esta "pandemia silenciosa".
A catedrática subliñou que esta ameaza require unha acción coordinada e global, reflectida no recente compromiso político acadado durante a 79.ª Asemblea Xeral da ONU, que establece o obxectivo de reducir as mortes por resistencia aos antimicrobianos nun 10 % para 2030.
Así mesmo, Mora enunciou os avances logrados polo Plan Nacional fronte á Resistencia aos Antibióticos (PRAN), que teñen posicionado a España como líder na redución do uso de antibióticos nos ámbitos da saúde humana e animal. Estes logros, mencionou, son un claro exemplo do impacto positivo das políticas enfocadas na racionalización do uso de antimicrobianos.
Como parte da súa intervención, compartiu a súa experiencia na investigación de bacterias zoonósicas, como Escherichia coli (E. coli), a cal foi fundamental para comprender o risco que supoñen para a seguridade alimentaria ao transmitirse entre animais e humanos. Neste sentido, enfatizou a importancia das medidas alternativas ao uso de antibióticos, tales como as vacinas, que non só reducen a necesidade de tratamentos antimicrobianos na produción animal, senón que tamén contribúen a mellorar a saúde pública.
Para pechar a súa intervención, Mora fixo un chamamento a continuar desenvolvendo ferramentas baseadas na xenómica e na intelixencia artificial, as cales permitirán anticipar a emerxencia de novas ameazas bacterianas e optimizar as estratexias terapéuticas nun entorno global de crecente resistencia antimicrobiana.
CARREIRA PROFESIONAL
Azucena Mora é doutora en veterinaria, foi premio extraordinario de tese doutoral da USC e recibiu o premio Syva á mellor tese en Sanidade Animal (2002). O seu interese investigador céntrase nas resistencias aos antibióticos cunha aproximación "One-Health”.
Foi investigadora do Programa Nacional Ramón e Cajal de atracción de talento (2007-2012) e actualmente é Catedrática de Microbioloxía na Facultade de Veterinaria de Lugo e directora científica do Centro de Investigación de Biomedicina e Veterinaria (CEBIOVET). É membro do Laboratorio de Referencia de E. coli (LREC) e dende 2023 integra o Comité Científico da Axencia Española de Seguridade Alimentaria e Nutrición (AESAN). Exerce como colaboradora do Plan Nacional de Resistencia aos Antibióticos da Axencia Española de Medicamentos e Produtos Sanitarios (AEMPS) e é Education Officer do ESCMID Food- and Water-borne Infections Study Group (EFWISG) (2024-2026).
Con máis de 25 anos de experiencia en E. coli patóxena para humanos e animais, dirixiu oito proxectos nacionais/rexionais como investigadora principal e numerosas teses doutorais e traballos científicos. É autora de máis de 100 publicacións científicas, dúas das cales foron merecedoras do Premio PRAN á mellor iniciativa de investigación nas edicións de 2018 e 2024.
