O Comité Organizador da Feira Internacional para a Produción Animal (Figan) fixo público hoxe un balance moi positivo da súa 17ª edición, sendo unha das plataformas clave para o negocio e a innovación no ámbito gandeiro a nivel internacional. O certame, celebrado en Feira de Zaragoza, reuniu a 1.214 marcas expositoras procedentes de 24 países, ocupando unha superficie de 64.591 m², e recibiu a visita de 60.757 profesionais, o que supuxo un incremento do 11 % respecto á edición anterior.
O certame acolleu o primeiro Foro Lácteo, unha das grandes novidades desta edición, que tivo unha excelente acollida por parte do sector. Organizado xunto a Vaca Pinta, este foro reuniu a expertos, produtores e distribuidores para debater sobre xenética, sustentabilidade, alimentación e dixitalización no ámbito da muxidura. A xornada, inaugurada pola conselleira do Medio Rural de Galicia, María José Gómez, consolidou este espazo como referente para o sector lácteo.
Un dos aspectos que máis destacan foi a calidade do perfil do visitante, orientado ao negocio e cun alto grao de especialización técnica. De feito, o 91 % dos asistentes afirmou ter cumprido os obxectivos marcados para a súa participación, e o 64 % prevé pechar algunha operación comercial derivada dos contactos realizados durante o certame. Deles, 3.693 eran visitantes internacionais de 54 países, con destacada presenza de profesionais procedentes de Europa, América, África e Asia. Esta dimensión internacional reforza o posicionamento global do salón.
Pola súa banda, as empresas expositoras tamén amosaron un alto nivel de satisfacción: o 93 % considera que cumpriu cos seus obxectivos.
O certame contou, así mesmo, con misións comerciais con empresas de 13 países, e Figan Conecta Talento consolidouse como unha iniciativa estratéxica para atraer a mozos profesionais ao sector gandeiro. Nesta mesma liña, a feira tamén apostou polo relevo xeracional coa acción Mozos Gandeiros, organizada xunto ao Grupo Vall Companys, na que creadores de contido debateron sobre os retos laborais da nova xeración no campo, a incorporación ao sector e o papel do talento para afrontar o despoboamento rural.
Outro dos grandes fitos desta edición, segundo din, foi a celebración, por primeira vez, das tres lonxas gandeiras máis importantes de España: Mercolleida, Binéfar e Ebro; reforzando así a conexión entre Figan e o pulso real do mercado pecuario.
Con estes excelentes resultados, o equipo organizador xa traballa na próxima edición, Figan 2027, que continuará apostando pola innovación, a profesionalización e o talento no sector gandeiro.
