O xuíz asturiano Paulino Badiola foi o responsable de xulgar os animais que participaron nesta nova edición do Concurso Morfolóxico de Gando Frisón de Menorca, celebrado esta fin de semana na localidade menorquina de Alaior.
O primeiro dos títulos en coñecerse, o de xata campiona, recaeu en Binillubet Chief Marianna, da gandería Binillubet (Es Mercadal), mentres que o de xovenca campiona foi para Biniatzem Skyhigh Kine, da explotación Bini-Atxem (Es Migjorn Gran). Na gran final Paulino Badiola decantouse polo animal máis novo e a banda de xovenca gran campiona entregóuselle a Marianna.
Entre todas as participantes resultou vaca nova campiona Rafal Fort Grade Isabel, propiedade de Binigafull (Ciutadella); Bell Lloch McCutchen 1346, de Son Bell Lloch (Ferreries), vaca intermedia campiona, e Biniseguí Byway Kala, de Binigafull, vaca adulta campiona.
Kala foi nomeada mellor ubre do certame e a súa gandería, Binigafull, conseguiu o premio de mellor rabaño. O galardón de mellor criador levouno Binillubet.
Na gran final de vacas, Badiola decidiuse polo animal intermedio e deu a palmada da vitoria a Bell Lloch McCutchen 1346.
