COVAP e Central Lechera Asturiana presentaron ‘Horizonte Rural’, un programa de innovación para afrontar os principais retos do sector lácteo desde unha perspectiva económica, social e ambiental. En colaboración con Social Nest Foundation, a iniciativa busca solucións tecnolóxicas sostibles e escalables mediante a cooperación con startups, expertos e institucións.
O programa seleccionará tres proxectos que respondan a desafíos clave: eficiencia tecnolóxica para optimizar a produción, sostibilidade ambiental con modelos de economía circular e relevo xeracional no sector. A convocatoria está aberta a emprendedores, pemes, centros tecnolóxicos e outras entidades, cun enfoque internacional, aínda que as solucións deberán aplicarse en España.
Tras a inscrición, cuxo prazo previsto é ata o 9 de marzo de 2025 na web horizonterural.es, un comité avaliador composto por expertos de Central Lechera Asturiana, COVAP e Social Nest revisará as candidaturas e preseleccionará varios proxectos, que serán considerados finalistas e que se presentarán nun Demo Day, onde serán avaliados por un xurado composto por expertos do sector agroalimentario, investidores e representantes de ambas as cooperativas. Neste evento seleccionaranse os tres gañadores, que obterán ata 10.000 euros para o desenvolvemento do seu proxecto piloto.
O ministro de Agricultura, Luis Planas, destacou durante a presentación do programa a importancia da dixitalización e a innovación no sector, mentres que os presidentes de Central Lechera Asturiana e COVAP subliñaron a necesidade de apoiar á nova xeración de gandeiros e fomentar un modelo máis sostible e competitivo.
