O venres 10 e o sábado 11 de marzo terá lugar a novena edición das Xornadas Internacionais de Bovinicultura en Vila Real (Portugal). A Asociación Internacional de Estudantes Agrícolas da Universidade de Trás-os-Montes e Alto Douro (IAAS-UTAD) organiza o evento, que se centra nesta edición no futuro do sector en Portugal.
O primeiro día haberá varias sesións en horario de mañá e tarde, nas que se tratarán temas como a importancia da calidade da auga na produtividade e a mitigación do estrés térmico en vacas leiteiras ou os aminoácidos e proteínas na dieta das vacas leiteiras. A primeira xornada concluirá cunha mesa redonda ao final do día. Durante a mañá do sábado os relatores afondarán en aspectos como por exemplo a valorización tecnolóxica do leite de vaca no queixo.
