O Consello de Ministros xa aprobou, a proposta do Ministerio de Agricultura, Pesca e Alimentación (MAPA), un paquete lexislativo composto por oito reais decretos que regulan a aplicación da Política Agraria Común para o próximo período de programación 2023-2027 e que entrará en vigor o 1 de xaneiro. En total, son oito reais decretos que se suman á lei que regula o sistema de xestión e aos de intervencións específicas para os sectores de froitas e hortalizas, vitivinicultura e apicultura xa aprobados, que garanten a aplicación e coordinación da nova PAC en xaneiro.
Seis dos oito decretos regulan cuestións ligadas á xestión das axudas: gobernanza; intervencións do plan estratéxico; requisitos comúns e solicitude única; axuda básica á renda para a sustentabilidade; condicionalidade reforzada e condicionalidade social; xestión e control das intervencións e o Sistema de Información das Explotacións (SIEX). Os outros dous decretos, que non afectan ás axudas directas, pero si á consecución dos obxectivos do plan estratéxico da PAC, regulan a nutrición sostible dos solos e o uso sostible dos produtos fitosanitarios.
Os agricultores e gandeiros españois recibirán en torno a 7.150 millones de euros anuais de axudas procedentes do Fondo Europeo Agrícola de Garantía Agraria (Feaga) e do Fondo Europeo Agrícola de Desenvolvemento Rural (Feader). En total, o paquete lexislativo da PAC está formado pola lei e 18 reais decretos, dos que xa se aprobaron 15. Os tres que están pendentes de publicación refírense a penalizacións, potencial vitícola e benestar animal, e, segundo indican desde o MAPA, non condicionan a entrada en vigor do plan estratéxico.
