O Museo Vivo e Integrado do Campo e da Locomoción Agraria (Muvicla) recibiu o pasado xoves na Escola Técnica Superior de Enxeñaría Agronómica, Alimentaria e de Biosistemas, en Madrid, un galardón como recoñecemento ao labor que vén desenvolvendo en relación co fomento agrícola, gandeiro e turístico das zonas rurais.
Na entrega do premio, concedido polo Colexio Oficial de Enxeñeiros Técnicos Agrícolas do Centro, estiveron presentes Marcos Vázquez, director do Muvicla, e María Bande, presidenta da Asociación de Amigos do Muvicla. Durante a cerimonia, ambos aludiron aos obxectivos últimos do museo: "Transmitir en esencia a importancia da simbiose entre a terra e a xente, ensinar e integrar vida, xerar cohesión, promover cooperación e inducir ilusión".
