A asemblea do sector lácteo do Sindicato Labrego Galego, celebrada o pasado 28 de outubro, acordou construír alianzas e unidade de acción asentadas en base a uns mínimos que eviten "a ilusión" de que unha mobilización puntual pode resolver o problema. Para iso, a Secretaria Xeral do SLG trasladou a Unións Agrarias a proposta de que a mobilización do día 11 en Vilalba, diante de Lactalis, sexa unitaria e poida ser apoiada pola totalidade do sector.
A proposta de mínimos elaborada pola dirección do SLG componse de seis puntos:
- Conseguir de inmediato un prezo que cubra os custos de produción e que indique o camiño de prezos que permitan vivir ás granxas.
- Convocatoria urxente da Mesa do Leite e con carácter permanente. A Consellería de Medio Rural ten a obrigación moral de buscar todas as vías psoibles para recuperar unhas condicións que garantan a viabilidade de todas as granxas galegas.
- Desenvolver referencias de custos de produción por parte da administración que fagan que sexa real a aplicación da prohibición de venda a perdas que se recolle na Lei da Cadea.
- Establecer un sistema de mediación que impida os abusos sobre a parte produtora e que garanta que os contratos non sexan de adhesión. Devandito sistema será en Galicia.
- Prohibir que os operadores lácteos, sexa industria ou primeiro comprador, puedna operar se non teñen aval suficiente para o pago de bótea ou se se teñen detectado faltas de pagamiento con anterioridade.
- Establecer unha liña de traballo urxente coas Administracións para reducir os custos de produción. Impedirase a especulación coas materias primas, acabarase coas tarifas eléctricas que penalizan a produción de alimentos, axudas a programas de desintensificación.
