Segundo afirma a Confederación Española de Fabricantes de Alimentos Compostos para animais (CESFAC), España vai autorizar de maneira inmediata a toma de medidas que permitirán en breve prazo reabastecer as necesidades de alimentación do gando.
A CESFAC xa solicitara ás autoridades que permitisen de maneira excepcional a importación de millo de orixe estadounidense, canadense e arxentino, así como de xirasol arxentino, actualmente dispoñible no mercado internacional.
Nestes momentos hai dispoñibles 13,6 millóns de toneladas de millo en EE. UU.; 7,5 millóns de toneladas de millo en Arxentina; 100.000 toneladas de semente de xirasol e 400.000 toneladas de torta de xirasol tamén en Arxentina. Así mesmo, a partir de finais do mes de marzo, estarán dispoñibles outros 15,4 millóns de toneladas de millo de colleita nova arxentina. "Esas cantidades servirían para cubrir as necesidades da produción española de alimentos compostos para animais ata enlazar coa campaña", afirman desde a confederación.
