A concellería de Desenvolvemento Rural e Actividade Agropecuaria da Estrada, liderada por María de los Ángeles Pais, organizou hoxe un encontro con gandeiros da comarca para fomentar o intercambio de coñecementos e recoñecer o esforzo das explotacións leiteiras máis destacadas. O evento contou coa participación de José Balseiros, director xeral de Gandaría e Industrias Alimentarias, quen apoiou a iniciativa coa súa presenza.
O encontro ofreceu un programa variado que incluíu dúas charlas técnicas a cargo de referentes do sector. Isolina Raña, da gandería Xesteda (A Coruña), compartiu a súa experiencia na xestión eficiente e sostible da súa explotación. Pola súa banda, Yolanda Torrents, da gandería Rodasinde (Lugo), abordou as claves para optimizar a calidade do leite e a rendibilidade nun contexto de crecentes desafíos para o sector.
Un dos momentos máis destacados da xornada foi a entrega de premios ás explotacións leiteiras gañadoras, seleccionadas con base nos datos de control leiteiro recollidos por Africor Pontevedra. Este recoñecemento puxo en valor o traballo dos gandeiros que se esforzan por acadar altos estándares de calidade e produción nas súas explotacións.
O encontro culminou cun xantar de confraternidade, que serviu como espazo para fortalecer os lazos entre os asistentes e fomentar a colaboración no sector.
