Hoxe o salón de actos do Centro de Investigacións Agrarias de Mabegondo (CIAM), en Abegondo (A Coruña), acolle unha xornada técnica sobre vacún de leite organizada pola Axencia Galega da Calidade Alimentaria (Agacal). Este evento reuniu a expertos de renome internacional para abordar estratexias que impulsen a eficiencia e sustentabilidade no sector lácteo.
A sesión foi inaugurada pola conselleira do Medio Rural da Xunta de Galicia, María José Gómez, quen destacou a importancia do vacún de leite como motor económico e social en Galicia. No acto inaugural estivo acompañada polo alcalde de Abegondo, José Antonio Santiso, e por Martín Alemparte Vidal, director da Agacal.
A xornada comezou coa intervención de Juan José Cerviño, director xeral da PAC e do Control da Cadea Alimentaria, quen ofreceu unha análise exhaustiva sobre a situación do sector lácteo galego, subliñando o seu papel clave na produción nacional.
Posteriormente, John Allen, director de AB Dairy Global e consultor de Kite Consulting, presentou unha ponencia centrada en como transformar as ameazas do sector en oportunidades, poñendo en valor a sustentabilidade como ferramenta estratéxica. A continuación, Andrea Lendewig, directora de investigación e desenvolvemento de IFCN, ampliou a perspectiva coa súa charla sobre "Tendencias mundiais e o mercado lácteo español", resaltando as claves do mercado global e o seu impacto no ámbito nacional.
Tras unha pausa para o café, a investigadora de EDF, Steffi Wille-Sonk, pechou o programa matinal cunha ponencia sobre a eficiencia técnica e económica das explotacións leiteiras españolas e europeas, compartindo datos comparativos e exemplos de éxito entre os gandeiros membros da Asociación EDF.
Tras o parón para o xantar, será a quenda de Tom Davis, nutricionista principal e cofundador de Kite Consulting, que abordará a eficiencia na nutrición durante o período de transición.
Ben Helm, director comercial global de AB Dairy, tomará a remuda para presentar formas innovadoras de mellorar a eficiencia e o rendemento en vacas e xovencas. Antes de finalizar, Jon Bakker, consultor internacional de nutrición de Duynie (Cooperativa Royal Cosum), exporá as "Opcións dispoñibles para mellorar a eficiencia e sustentabilidade na granxa".
A xornada concluirá cunha mesa redonda, onde se resumirán os principais puntos tratados e ideas prácticas para aplicar nas explotacións.
