O fundador do actual Grupo Aresa, Álvaro Rodríguez Eiras, impulsor ademais do Premio Aresa de Desenvolvemento Rural e primeiro presidente da Confederación de Empresarios de Lugo (CEL), faleceu esta madrugada aos 92 anos.
Álvaro Rodríguez Eiras, natural de Meira, localidade da que tamén foi alcalde con tan só 27 anos, deu os seus primeiros pasos no sector primario ligado ao comercio dos seus pais, José Rodríguez e Lucila Eiras. Máis tarde trasladouse á capital lucense onde creou os alicerces do que hoxe é o Grupo Aresa. Ano tras ano consolidou o seu negocio e fíxoo medrar de maneira exponencial ata a incorporación da súa sobriña Carlota López, actual vicepresidenta do Grupo.
A súa enorme implicación no mundo agrario e gandeiro e o seu afán por recoñecer traxectorias de persoas, entidades públicas e privadas ou empresas que contribuísen ao desenvolvemento rural levouno hai 25 anos a crear, da man da Universidade de Santiago de Compostela, o Premio Aresa de Desenvolvemento Rural.
Este luns, ás 20.00 horas, celebrarase unha misa na súa memoria, no tanatorio de Velatorios Lucenses. Mañá martes, ás 17.00 horas, oficiarase o seu funeral na igrexa de Santiago A Nova.
Desde a revista Vaca Pinta e Transmedia Comunicación trasladamos o noso sentido pésame aos seus familiares e amigos.
