A asociación Mulleres de Seu, impulsada pola cooperativa rural CLUN, e a marca de leite Feiraco celebran o Día Internacional das Mulleres Rurais este venres 14 de outubro con actos conmemorativos en Mazaricos.
Baixo a lema “Mulleres rurais: raíces e futuro da nosa terra” desenvolverase un completo programa de actos que inclúe a celebración dun panel de experiencias protagonizado por mulleres gandeiras socias de Mulleres de Seu, as cales compartirán as súas vivencias e reflexións.
O encontro será apadriñado pola Consellería de Igualdade Emprego coa presenza da secretaria xeral, Susana López Abella, e pola Consellería de Medio Rural, con Mª Luisa Fenda Pumar, secretaria xeral da Axencia Galega de Desenvolvemento Rural, así como polo alcalde de Mazaricos, Juan Blanco.
Así mesmo, como parte das celebracións con motivo desta efeméride, o artista MonDevane realizou un mural no centro urbano do municipio. Trátase dun retrato anónimo de máis de 9 metros de altura que se inspira nas mulleres gandeiras e pretende visibilizar e reivindicar, en concreto, o papel da muller gandeira neste concello, o que máis leite produce de toda Galicia.
