A 46.ª edición do Concurso-Exposición de Gando Vacún de Llanera celebrouse no recinto feiral da localidade asturiana esta fin de semana. Ademais das competicións de raza frisona e de Asturiana de los Valles de tipo normal e de dobre grupa celebrouse a III Poxa de Elite de Gando Vacún.
Entre as xatas e xovencas participantes, a xuíza Claire Swale, asistida por Giuseppe Beltramino, decantouse por Iglesias Sira Unix, da gandería Manuel Ángel Iglesias Suárez (Llanera), como xata campiona, e por Otura 5287, de Violeta Garrido Cabeza (Llanera), como xovenca campiona. Na gran final a xata logrou alzarse co título de gran campiona.
Nas seccións de vacas, Parlero Wilson Helectra, de Ganadería Parlero SC (Valdés), conseguiu o premio de vaca nova campiona; Flora Jacoby Lis ET, de Ganadería Flora SC (Valdés), foi elixida como vaca intermedia campiona e Flora Alexander Dafne, de Ganadería Flora SC, impúxose ás vacas adultas. Flora Jacoby Lis ET arrasou na gran final e levou o premio de mellor ubre e de gran campiona de vacas. O título de mellor rabaño levouno a gandería Badiola Holstein (Gozón).
