O Centro de Promoción Rural EFA Fonteboa (Coristanco, A Coruña) está a levar a cabo nesta primeira quincena de outubro o Proxecto DronRural, que consiste na celebración de varias xornadas para capacitar a mozos e mozas no manexo, as normas e a obtención da licenza de piloto, ademais de explicar as posibilidades que ofrecen os drons nas actividades rurais.
O programa de formación continua do centro para o período outubro-decembro 2021 conta ademais, para a área de vacún leiteiro, cun curso sobre muxido, que terá lugar do 17 ao 21 de outubro; un ciclo de xornadas sobre o uso sustentable da auga, para os días 18, 20, 25 e 27 de outubro; un seminario sobre toma e interpretación de mostras de sangue, feces etc. en gando vacún (días 25 e 26 de outubro) e un curso sobre benestar animal, que se celebrará os días 21 e 25 de novembro.
Outros cursos que están previstos ao longo deste último trimestre do ano teñen que ver cos ámbitos da apicultura, a horta ou o sector forestal, entre outros.
