A Asociación EFA Fonteboa impartirá diversos cursos durante estes meses, desde abril a xullo, no marco do seu programa de actividades de formación continua. Destacan dentro do sector o de estratexias para uso sustentable dos antibióticos nas ganderías de leite, o de arredor do leite e o de benestar animal. Outro programa resaltable son as xornadas técnicas sobre o cultivo de millo e da alfalfa.
Os días 13 de abril, 11 e 26 de maio terá lugar o curso de estratexias para uso sustentable dos antibióticos nas ganderías de leite. Trataranse temas como a prevención da mamite e secado selectivo e a importancia das Asociacións de Defensa Sanitaria.
O 1 de xuño, Día Mundial do Leite, haberá actividades de difusión dos produtos lácteos. O sábado 3 de xuño celebrarase a BTT Vía Láctea, un percorrido en bici que pasará por explotacións de leite e poñerá énfase na importancia da produción láctea no itinerario.
Na semana do 5 ao 9 de xuño haberá un curso no que se abordarán contidos sobre benestar animal en ganderías, matadoiros e transporte.
Outras actividades que están previstas para estes meses están relacionadas con formación forestal, apicultura ou horticultura, entre outras.
