O Ministerio de Agricultura, Pesca e Alimentación deu a coñecer os gañadores dos Premios Alimentos de España 2021, que alcanzaron a 36.ª edición. Estes galardóns recoñecen o esforzo realizado por empresas e profesionais do sector agroalimentario que se distinguiron por producir, ofrecer e divulgar os alimentos de calidade españois, así como a súa contribución ao desenvolvemento do sector alimentario español de forma sustentable e eficiente.
Nesta edición, a firma Kalekói SL (Lalín, Pontevedra) obtivo o Accésit á Iniciativa Emprendedora. Desde o xurado valoran que sexa unha iniciativa de dous mozos coa que transforman o leite obtido na súa explotación familiar. Detallan que ofrece unha proposta diferenciadora nun mercado tradicional, que lle permite situarse con produtos alternativos baseados na calidade e a preservación da actividade agraria.
Nas demais categorías os premiados foron: Agropal Sociedade Cooperativa Limitada (Palencia), en Industria Alimentaria; Suerte Ampanera (Colmenar Viejo, Madrid), en Produción Ecolóxica; Aceites García da Cruz (Madridejos, Toledo), en Internacionalización Alimentaria; Gambanatural de España, SL- Noray Seafood, SL (Medina del Campo, Valladolid), en Produción da Pesca e a Acuicultura; Adoración Fernández Armero e Enrique Jacinto Trenado, polo programa En Clave Turismo, que emite Radio Exterior de España, na categoría de Comunicación, e El Olivar (Moratalla, Murcia), en Restauración.
