O equipo veterinario da ADSG de AIRA organizou unha xornada formativa no auditorio de Chantada dirixida aos socios da ADSG de Palas de Rei, Chantada, Carballedo e Taboada. A cita contou con diversos profesionais para abordar a enfermidade hemorráxica epizoótica (EHE).
O primeiro en intervir foi Alberto Díez Guerrier, veterinario clínico especialista en rumiantes e profesor asociado de Sanidade Animal da Facultade de Veterinaria da UCM. Na súa charla, titulada ‘EHE, un reto para a gandería’, abordou a historia da enfermidade, así como a evolución que tivo en España entre 2022 e 2023. Tamén tratou a morbilidade e a mortalidade, ademais das secuelas que deixa nas ganderías. Logo expuxo medidas para o control e a prevención, que deben provir da administración. Finalmente, tratou os estudos de prevalencia que existen ata o momento e reflexionou sobre se diminuirá o problema.
Seguidamente, Víctor Collado Alcalá, técnico do departamento de Gandería en Cooperativas Agroalimentarias de España, centrouse na actualización da situación da EHE en España. Lembrou que, desde a detección da enfermidade hemorráxica epizoótica en novembro do ano 2022, foi necesario pór en marcha unha serie de iniciativas e medidas encamiñadas, por unha banda, a controlar a enfermidade desde un punto de vista sanitario e, doutra banda, a manter a estrutura produtiva e comercial dos sectores afectados por esta enfermidade. Incidiu en que o sector, os veterinarios e a administración tiveron que afrontar con bastante descoñecemento o avance e desenvolvemento da enfermidade. Durante a súa charla expuxo algúns dos estudos que se están levando a cabo co fin de abordar a enfermidade no presente e no futuro a curto prazo.
Xosé Lois Arias Pérez, xefe da área de Servizos Veterinarios de Medio Rural de Monforte de Lemos, pechou os relatorios con unha charla titulada ‘EHE en Galicia’. Arias abordou as condicións para o movemento do gando, os datos que hai en Galicia sobre a enfermidade e as indemnizacións previstas pola Consellería, “que polo momento só cobren os animais mortos, non os gastos que xeran os animais que sobreviven”. Tamén explicou as colaboracións que hai actualmente co Ministerio de Agricultura, que teñen como finalidade recompilar datos que axuden a coñecer a enfermidade.
Finalmente, celebrouse unha mesa redonda na que os gandeiros e as persoas asistentes tiveron a oportunidade de resolver as dúbidas que lles xurdiron sobre esta enfermidade, que provoca gran preocupación no sector.
