Este martes, María José Gómez, conselleira do Medio Rural da Xunta de Galicia, realizou a súa primeira visita á sede de Grupo Lence en Lugo dende que asumiu o seu cargo en abril deste ano. Durante a visita, estivo acompañada por José Balseiros, director xeral de Gandería, Agricultura e Industrias Agroalimentarias. A CEO de Grupo Lence, Carmen Lence, e o equipo directivo da compañía, encabezado por Jesús García, COO, recibiron á comitiva.
Grupo Lence, unha das principais empresas do sector lácteo en Galicia e España, mostrou á conselleira as súas instalacións e os avances en innovación e modernización que están a implementar para mellorar a eficiencia operativa. Durante o percorrido pola planta, destacou o compromiso da compañía coa produción e comercialización de leite 100% galego, un factor clave para impulsar a calidade do produto e o traballo dos gandeiros da rexión.
María José Gómez subliñou a relevancia de Grupo Lence como referente no sector lácteo, sinalando o seu liderado na recollida, transformación e comercialización de leite de orixe galego. Ademais, destacou o papel da compañía na dinamización do medio rural e o esforzo continuo pola modernización do sector. "Estamos moi preto de acadar o obxectivo do 75% de transformación do leite en Galicia, grazas á aposta de empresas como Grupo Lence", declarou a conselleira, aliñando este esforzo coa Estratexia de Dinamización do Sector impulsada pola Xunta.
Carmen Lence, pola súa banda, agradeceu a visita da conselleira e reafirmou o compromiso da empresa co rural galego e coa sustentabilidade do sector. "É crucial que manteñamos unha relación estreita coa administración para seguir impulsando proxectos que doten de servizos o campo, recoñezan o traballo dos gandeiros e gandeiras, fortalezcan o papel da muller no rural e modernicen o sector lácteo", sinalou a CEO.
No encontro privado posterior á visita, discutíronse temas relacionados coa situación do sector lácteo e o apoio da Xunta, que se traduce en axudas destinadas á transformación e comercialización de produtos lácteos, beneficiando máis de 600 proxectos empresariais dende 2016. Así mesmo, Gómez reiterou a necesidade de traballar conxuntamente para garantir prezos xustos para os gandeiros, que cubran os seus custos de produción e aseguren unha rendibilidade adecuada.
A conselleira pechou a súa visita resaltando a importancia de que Galicia continúe liderando a produción e transformación láctea a nivel nacional, cun claro apoio do Goberno galego a todas as empresas e axentes involucrados na cadea de valor do sector.
