O centro de promoción rural EFA Fonteboa impartirá os días 17, 19, 24 e 26 de outubro, en horario de tarde, un curso sobre uso sustentable da auga na agricultura, o cal está dirixido a estudantes e docentes de FP das familias agraria e de industrias alimentarias e a profesionais que exercen a súa actividade nestes sectores.
Durante o mesmo, os participantes aprenderán métodos para a optimización e a reutilización da auga na agricultura, técnicas de cultivo para reducir o uso da auga, últimas tendencias tecnolóxicas en sistemas de rega e intelixencia artificial e outras tecnoloxías aplicadas ao uso sustentable da auga.
Dita formación enmárcase nun proxecto promovido por CaixaBank Dualiza que se desenvolverá en nove comunidades autónomas e do que se beneficiarán case 400 persoas de todo o país, entre estudantes, profesores e profesionais de FP.
A través deste curso, CaixaBank e as EFAS tratan de fomentar solucións coas que responder a un dos grandes problemas da industria e a agricultura do noso país, a cada vez máis agravante escaseza de auga, e a necesidade de optimizar o seu uso nos sistemas produtivos.
