- As conferencias continuarán mañá, venres, na Facultade de Veterinaria de Lugo con máis gandeiros e expertos en tecnoloxía e forraxes
A cooperativa Seragro organiza por vixésimo primeira vez as Xornadas Técnicas de Vacún de Leite, con especial atención aos temas de actualidade do sector. O auditorio da Facultade de Veterinaria de Lugo está a ser novamente o lugar de encontro de gandeiros, veterinarios, estudantes e máis persoal relacionado co ámbito bovino.
O evento comezou ás 10:30 horas coa inauguración, na que participaron Víctor Manrique, presidente de Seragro, e Luis Quintela, profesor e vicedecano da facultade.
Posteriormente, deron paso a Juan Francisco Sánchez Madueño, veterinario e cofundador de SamaVet, quen expuxo as aplicacións prácticas dos coñecementos da epixenética en granxas de vacún leiteiro.
Da análise da xenómica ocupouse Francisco Peñagaricano en dúas ocasións. Antes da pausa do café, o profesor asociado no Departamento de Ciencias Animais e Lácteos da Universidade de Wisconsin-Madison explicou os avances, desafíos e perspectivas das probas xenómicas en vacún leiteiro. Máis adiante, e con datos de granxas galegas, detallou a evolución das mesmas tras a implantación do xenotipado.
A xornada de tarde foi un monográfico aberto ao debate sobre as instalacións de muxido en grandes granxas. Primeiro, o veterinario e asesor Javier Liste pormenorizou sobre os sistemas actuais que permiten obter leite das vacas; logo, tres gandeiros contaron a súa experiencia a pé de muxidoira.
Manuel Sandá, da Gandería SAR (Touro), relatou o seu día a día co muxido traseiro; Rubén Gómez, da Granxa A Esperanza (San Sadurniño), profundizou na práctica coa sala rotativa; e Cristóbal Touriñán, da Ganadería Pastora (Muxía), analizou o recentemente implantado sistema batch milking.
Para finalizar o día, levouse a cabo o encontro gandeiro, que nesta ocasión correu pola conta da casa comercial Lely, que abordou as características do muxido robotizado con tráfico libre.
