A Organización Interprofesional Láctea (InLac) dálle voz ao investigador do Instituto Universitario de Ciencia e Tecnoloxía Animal (ICTA) e representante do Comité de Sustentabilidade Láctea, órgano de expertos que asesora as mensaxes da campaña informativa "Conta cos produtos lácteos europeos", Salvador Calvet. Deste xeito, Calvet explica que o sector gandeiro en xeral e o lácteo en particular deron pasos de xigante nos últimos anos para reducir os impactos ambientais, aínda que non sempre os consumidores son conscientes destes logros.
Salvador Calvet explica que hai varios motivos que xustifican esta evolución. Por unha banda, a presión normativa obriga a considerar criterios ambientais na produción gandeira pero, por outra banda, lembra que "estamos ante un sector cada vez máis moderno que interioriza con convicción a responsabilidade que ten co seu contorno".
Para seguir avanzando, segundo este experto hai que ir máis alá da eficiencia produtiva e emprender medidas de mitigación: "Temos moitas ferramentas á man: a mellora xenética, o deseño de instalacións ou os sistemas de tratamento de estercos. Son só algúns exemplos de estratexias cun gran potencial".
"A gandería desempeña un papel esencial na reciclaxe de nutrientes e en xeral na soberanía alimentaria. Formular calquera estratexia para loitar contra os efectos do cambio climático excluíndo a gandería é unha utopía ou unha irresponsabilidade", explica o investigador valenciano.
