O director da Axencia Galega da Calidade Alimentaria (Agacal), José Luis Cabarcos, participou nunha xornada expositiva no Centro de Formación e Experimentación Agroforestal de Sergude (Boqueixón). O obxectivo era expor a actividade investigadora e de transferencia levada a cabo nos centros de investigación que dependen da Consellería do Medio Rural. En concreto, no Centro de Investigacións Agrarias de Mabegondo (CIAM), no Centro de Investigación Forestal de Lourizán e na Estación de Viticultura e Enoloxía de Galicia.
Preto dunha trintena de investigadores mostran as súas liñas de traballo, facendo fincapé nos coñecementos xerados tanto nos proxectos en curso como nos recentemente concluídos. No relativo ao CIAM, póñense en valor liñas de traballo para a valoración nutricional de forraxes, para a mellora da produción de leite ou de carne, para a consecución de sistemas produtivos sustentables, para a conservación e mellora de recursos fitoxenéticos agrarios ou para a consolidación do status sanitario da cabana gandeira.
No caso do centro de Lourizán, ponse en substitución a mellora xenética de diversas especies, a mellora silvícola, a recuperación de áreas afectadas polo lume e a adaptación e preservación de ecosistemas forestais ao cambio climático. Mentres, representantes da Estación de Viticultura e Enoloxía de Galicia tratan os avances en relación ao material vexetal e recursos xenéticos, ademais de diversos proxectos de enoloxía.
Nas exposicións, os participantes ocúpanse de facer balance do financiamiento empregado en relación aos beneficios que supoñen os resultados das investigacións. Así mesmo, sinalan estratexias concibidas para facer chegar eses resultados ao sector primario, no caso de actividades de transferencia.
