As indemnizacións abonadas por Agroseguro aos agricultores e gandeiros asegurados en Galicia polos sinistros rexistrados durante o ano 2024 eleváronse ata os 31,7 millóns de euros, un 16 % máis que no ano anterior, a cifra máis elevada dos últimos anos.
Por provincia, os agricultores e gandeiros de Lugo recibiron 14,8 millóns de euros en indemnizacións (+15 %). A continuación, sitúase A Coruña (11,2 millóns, +17 %), Pontevedra (3,8 millóns, +22 %) e Ourense (2,4 millóns, +14 %).
Por liña de seguro, destacan as indemnizacións abonadas aos gandeiros galegos asegurados nas diferentes liñas que cobren os accidentes e enfermidades do gando vacún, que medran ata os 16,2 millóns, un 20 % máis que no ano 2023. Ademais, a liña de seguro que cobre os gastos derivados da retirada e destrución de animais mortos alcanzou outros 14 millóns de euros.
Pola súa banda, os sinistros rexistrados nas liñas de seguros agrícolas e forestais medran un 82 % ata os 1,46 millóns de euros, con especial impacto dos danos por vento en millo forraxeiro que provocou o furacán Kirk no mes de outubro, con máis de 9.000 hectáreas sinistradas e case un millón de euros en indemnizacións abonadas. O resto corresponde a sinistros abonados a produtores asegurados de viñedo, planta viva, forestais, hortalizas, herbáceos extensivos ou amorodos e froitos vermellos, entre outras liñas.
O ano 2024 pechouse, a nivel nacional, con 712 millóns de euros de sinistralidade, o cuarto ano consecutivo por enriba dos 700 millóns. Esta alta sinistralidade corrobora os graves efectos da realidade climática actual sobre as explotacións agropecuarias, e constata a necesidade de contar cun seguro agrario para garantir o seu futuro e viabilidade. É importante recalcar que as contías abonadas nos últimos anos por Agroseguro son as máis elevadas nos 44 anos de historia do sistema español de Seguros Agrarios Combinados. No caso concreto de Galicia, as indemnizacións abonadas no período 2020-2024 elévanse por riba dos 140 millóns de euros.
