Os produtores de leite entregaron un bolo de palla na porta do supermercado Pingo Doce de Barcelos, o municipio que máis produce leite no país. Con esta "oferta" protestan contra os baixos prezos do leite, alertan do aumento de custos de produción que "están a arruinarnos" e desafían á firma de supermercados a dar exemplo e pagar un prezo xusto aos gandeiros.
"Levamos soportando subidas de entre o 20 e o 30 % no prezo dos pensos desde o ano pasado e, máis recentemente, noutros factores de produción como a electricidade, o combustible e os fertilizantes, pero só en outubro conseguimos un pequeno aumento de 1,5 céntimos por litro de leite das principais industrias. Isto non é suficiente. Necesitamos urxentemente outro aumento de 5 céntimos, co obxectivo de chegar aos 40 céntimos por litro de leite pagados ao gandeiro", aseguran da Asociación de Produtores de Leite Aprolep.
Resaltan que os gandeiros que abastecen a Pingo Doce tiveron unha subida menor, de só 1 céntimo, a pesar de que o grupo Jerónimo Martins ten unha fábrica onde procesa o leite e envasa as súas propias marcas. "As cadeas de distribución adoitan argumentar que están obrigadas a seguir os prezos do mercado, pero tamén son elas as que manipulan este mercado utilizando o leite como cebo para atraer aos consumidores", apuntan desde Aprolep.
Desde a asociación solidarízanse cos produtores de leite e carne que se manifestan hoxe na illa de Terceira, nos Azores, a rexión cos prezos de produción de leite máis baixos de Portugal e que ten o prezo medio máis baixo de Europa.
