Tras meses de rigorosas reunións e meditadas valoracións por ambas partes, as revistas ¡Hola! e Vaca Pinta acadaron por fin un acordo e Eduardo Sánchez Pérez, director de ¡Hola!, e José Manuel Gegúndez Mirón, director executivo de Vaca Pinta, asinaron un convenio para levar a cabo xuntos un novo proxecto editorial orixinal, baseado na actualidade do sector gandeiro que os demais non contan: historias únicas de interese humano e reportaxes exclusivas coas personaxes máis prestixiosas.
Vaca Pinta pon así fin a un 2024 de luxo cunha nova sección na súa páxina web vacapinta.com que levará por título Vaca Rosa. Estes contidos de actualidade e estilo de vida actualizaranse diariamente e enriquecerán a oferta innovadora, multimedia e multicanle da prestixiosa cabeceira técnica do vacún leiteiro.
Vaca Rosa será a primeira sección do mundo dedicada a contar as historias máis persoais e sorprendentes dos profesionais do sector gandeiro e nace co compromiso de compartir as mellores exclusivas co obxectivo de entreter e dar que falar. Esta fusión entre o mundo do corazón e o sector do vacún leiteiro explorará o lado máis íntimo dos gandeiros, os veterinarios e os técnicos dedicados á produción de lácteos, porque detrás de cada cartón de leite, cada queixo ou cada xeado existen historias dignas de grandes portadas.
Se queres coñecer as primeiras novas do corazón no noso sector, ponte ao día de inmediato e entra xa na sección VacaRosa.com.
