Agolada Rural, a asociación dirixida por Rafael Méndez, fixa a 6.ª edición das súas xornadas técnicas sobre a mellora no manexo de gando bovino para o venres 25 de novembro. As conferencias terán lugar no auditorio Manuel Costa Casares de Agolada (Pontevedra).
A cita dará comezo coa inauguración do alcalde da localidade, Luis Calvo, e ás 10:30 horas Carlos Ledo, de Unións Agrarias, falará da xestión do xurro. O autoconsumo fotovoltaico e as tarifas eléctricas serán as temáticas da seguinte charla, que ofrecerán Carlos García, enxeñeiro industrial; Mariano Manteiga, axente enerxético, e Javier Fernández, de Sociere Renting.
Ás 12:30 horas entregaranse os premios aos nenos gañadores do concurso de debuxo e logo os deputados do BNG Carmen Aira e Luís Rivas abordarán diferentes aspectos da PAC 2023/2027. Para finalizar, haberá un sorteo de 10 lotes de doses de touros procedentes de Xenética Fontao.
