A Escola Superior Politécnica de Enxeñaría de Lugo organiza o ciclo de conferencias Robótica Agrícola e Gandeira os próximos 11 e 12 de xullo, cuxa finalidade é difundir a necesidade de formación superior en enxeñaría para converterse en técnicos especializados en robótica e contribuír a posicionar a Escola como un centro de referencia no ensino superior en agrorrobótica.
Esta mañá tivo lugar a presentación do programa por parte da directora da EPSE, Rosa Romero; do coordinador do grao en Robótica da USC, Roberto Iglesias, e do profesor da mención da especialidade en Agrorrobótica incluída neste título de grao, Javier Bueno.
O programa de conferencias, que se desenvolverán no salón de actos da Escola do Campus Terra de Lugo, contará coa presenza de catro profesionais do mundo da empresa e da investigación. Germán Martínez, presidente de Kubota España; Alberto Sánchez, responsable de Lely Ibérica, e os investigadores do CSIC Ángela Ribeiro e Dionisio Andújar tratarán o estado da robotización agrícola e gandeira en España no momento actual e as tendencias futuras.
A EPSE organiza o ciclo coa axuda da Deputación de Lugo e da Vicerreitoría de Organización Académica e Campus de Lugo, xunto coa colaboración da Confederación de Empresarios de Lugo e da Fundación Agroalimentaria de Galicia.
O prazo de inscrición nestas xornadas permanece aberto ata o 11 de xullo nesta páxina web, en que as persoas interesadas poden formalizar gratuitamente a súa participación.
