O Diario Oficial de Galicia (DOG) publicou onte a resolución de Medio Rural que regula o procedemento para a concesión das axudas destinadas a subministrar leite, froita fresca e castañas aos centros escolares galegos durante o curso 2022-2023. As achegas dispoñibles desta volta superan os 500.000 euros no apartado do leite e os 600.000 euros no caso da froita.
O prazo para presentar as solicitudes para estas axudas remata o 20 de setembro e poderán adherirse os centros escolares de educación infantil, primaria e secundaria (incluíndo a educación secundaria obrigatoria, o bacharelato e a formación profesional de grao medio).
En cada un dos dous períodos establecidos (de novembro de 2022 a febreiro de 2023 e de marzo a xuño de 2023) a distribución de froitas frescas e castañas levarase a cabo durante 10 días lectivos consecutivos, mentres que no caso do leite líquido se realizará durante un mínimo de 20 días lectivos seguidos.
A través desta liña de subvencións, Medio Rural busca potenciar o consumo de froita e leite entre os nenos e a mocidade para fomentar hábitos alimenticios saudables que poidan manter no futuro, así como promover a distribución de produtos galegos que empreguen na súa obtención sistemas de produción sustentables e que sexan respectuosos co medio ambiente.
