O Diario Oficial de Galicia (DOG) publica hoxe a orde de axudas de Medio Rural para fomentar a agricultura de precisión, a eficiencia enerxética e a economía circular no sector agrario. Están dotadas dun orzamento de 7,41 millóns de euros cos que se prevé beneficiar unhas 250 explotacións e financiadas con Fondos Next Generation, que derivan do Plan de Recuperación, Transformación e Resiliencia.
Os interesados teñen un prazo de dous meses, a contar a partir de mañá, para presentar as solicitudes de forma telemática para estas subvencións que terán en conta, entre outras áreas, a xestión de estercos, a eficiencia enerxética e a agricultura de precisión.
No que se refire á xestión de estercos, financiaranse investimentos nas explotacións gandeiras relacionadas coa adaptación ou cubrición das balsas ou depósitos exteriores novos ou existentes que reduzan os gases de efecto invernadoiro (como as fosas de xurro). No referente á eficiencia enerxética sufragaranse investimentos en eficiencia e en fontes renovables para mellorar a sustentabilidade económica e ambiental mediante a redución do consumo de enerxía allea nas explotacións agrarias. Por último, en relación coa agricultura de precisión, apoiaranse investimentos en agricultura e gandería de precisión e en tecnoloxías 4.0 co obxectivo de mellorar a seguridade alimentaria, a rendibilidade económica e a sustentabilidade ambiental.
