A Organización Colexial Veterinaria (OCV) subliña "a importancia de promover a utilización do gando como unha ferramenta imprescindible para evitar ou diminuír de forma considerable o número de incendios que arrasan o noso país cada ano, xa que o pastoreo é unha práctica ancestral con evidentes beneficios sobre os ecosistemas".
A OCV explica que a gandería extensiva realiza "un labor de limpeza que a converte nunha das principais bazas para a prevención de incendios ao rozar o monte en zonas nas que non o fai o home, por tratarse de terreos sen uso agrícola que se foron abandonando, e que se converten co paso do tempo en áreas de matogueira con perigo polo seu carácter inflamable".
Neste sentido, explica que o mantemento da gandería no medio rural, e por conseguinte o labor que realizan os veterinarios no campo, "é fundamental para garantir o correcto funcionamento dos ecosistemas e así axudar a paliar os efectos do cambio climático".
Factores como a maior incidencia da seca e a subida xeneralizada das temperaturas, que provoca que agoste a vexetación, e o abandono rural, que xera que a masa boscosa se multiplique e permita que o lume poida avanzar sen freo, son as principais causas dos incendios que se producen en España.
Os meses estivais resultan críticos debido ás condicións favorables para a aparición e expansión de incendios. Nese período hai que estar especialmente atentos cando se cumpre a chamada regra do 30-30-30, que se traduce en máis de 30 graos de temperatura, ventos de máis de 30 km/h e unha humidade relativa de menos do 30 %.
Nestas ocasións complícase a mitigación dos incendios a pesar do despregamento de medios humanos e técnicos, polo que a súa prevención é de vital importancia, "e aí debe desempeñar unha función primordial a gandería en réxime extensivo, en especial de ruminantes, pois aproveitan ao máximo os recursos naturais dispoñibles e a miúdo son razas autóctonas, é dicir, plenamente adaptadas aos rigores estivais da península ibérica e aos seus diferentes chans".
