A conselleira do Medio Rural, María José Gómez, visitou esta mañá o Centro de Investigacións Agrarias de Mabegondo (CIAM), situado na localidade coruñesa de Abegondo. Alí, puxo en valor os resultados da poxa de gando organizada por este centro o pasado mes de xullo e anunciou que, tendo en conta a boa acollida que tivo, prevese convocar unha nova edición a finais de ano, sempre e cando se cumpran as condicións hixiénico-sanitarias necesarias.
No marco desta visita, á que tamén asistiu o director da Axencia Galega da Calidade Alimentaria, Martín Alemparte, a titular de Medio Rural explicou que na primeira poxa alleáronse máis de medio centenar de exemplares de vacas de raza Rubia Galega destinadas a reprodución. Neste sentido, adxudicáronse a totalidade dos animais a 13 explotacións, divididos en 42 lotes con xovencas nadas entre 2021 e 2022, con ou sen cría.
Ademais, salientou os bos resultados deste evento, que chegou a superar nun 18 % o seu prezo de saída, acadando algo máis de 94.000 euros, que se empregarán para seguir afondando na investigación e mellora desta raza autóctona. Os concursos deste tipo permítenlle a gandeiros e gandeiras ampliar ou diversificar as súas producións, ao mesmo tempo que se preservan e potencian as razas autóctonas características da nosa comunidade e se promove a súa mellora xenética.
