Mercadona comunicou no día de onte subidas nos prezos dos leites dos seus liñais. A partir do pasado 17 de agosto xa se está facendo efectiva a subida nos leites non dependentes deles mesmos. Están a incrementar o prezo nestes produtos de 2 a 9 céntimos para que as correspondentes industrias repercutan a subida aos gandeiros. En relación aos leites da súa propia marca Hacendado subirán o seu prezo, a partir do día 3 do vindeiro mes, 3 céntimos nos leites básicos, 2 céntimos nos leites con calcio e sen lactosa e 5 céntimos nos minibricks.
Asegura que quere prezos nos liñais por encima dos 60 céntimos. O seu leite enteiro quedará en 0,62 €; o semidesnatado, en 0,61 €, e o desnatado, en 0,60 €.
Con esta medida, espera que o resto de cadeas tamén suban os prezos. De non ser así, se os consumidores non responden e se perden vendas, terán que volver reducilos.
Desde a Organización de Produtores de Leite (OPL) cualifican a medida como positiva, aínda que insuficiente, e desexan que "este anuncio arrastre ás demais cadeas da distribución e da industria para lograr un prezo xusto para todos, que se solucione a grave situación que pasamos os gandeiros de leite e que por fin se cumpra a Lei da cadea alimentaria. Oxalá que este sexa o principio dunha subida dos prezos en orixe, que repercuta aos gandeiros. Non podemos esquecer que o último estudo publicado polo Ministerio reflicte que, para cubrir a subida dos custos de produción, os leites non deberían estar por baixo dos 70 céntimos".
