O sector do vacún de carne reivindica o papel esencial que xogan os rabaños na prevención de incendios durante todo o ano e, ademais, de forma moi económica e sustentable, xa que a alternativa ás reses require de gran cantidade de maquinaria pesada e o uso de combustibles fósiles contaminantes, ao que se engade o risco para a integridade de miles de persoas que participan na extinción.
"Non hai nada que limpe e manteña mellor os montes que as vacas", destacou o presidente da Organización Interprofesional Agroalimentaria da Carne de Vacún (Provacuno), Eliseo Illa, tras pór en valor este traballo silencioso e non suficientemente coñecido nin recoñecido, que desempeña o gañado os 365 días do ano.
"A extinción por si soa non resolve o problema dos incendios; hai que investir en prevención e apoiar aos gandeiros. Cada ano conseguimos apagar miles, de forma exitosa, con todo, cada vez soportamos incendios forestais de maior dimensión que calcinan áreas superiores a 500 hectáreas, que coinciden coas zonas onde se abandona a actividade agrícola e gandeira", puntualiza Javier López, director de Provacuno. E engade, "a gandería bovina e as súas vacas-bombeiro poden ser unha solución para manter os montes limpos e libres de material inflamable. O noso gando é un aliado a ter en conta na prevención de incendios forestais e para tentar reducir o risco para as brigadas de extinción que se xogan a vida fronte ao lume cada verán".
