Provacuno, Organización Interprofesional da Carne de Vacún, súmase á celebración do Día Mundial da Hamburguesa, que se conmemora cada 28 de maio, coa presentación dunha nova e divertida campaña na que quere revindicar o uso da palabra "hamburguesa" só para as que leven carne. As que non, "son outra cousa, pero non son hamburguesas", como reza o anuncio que se lanza a partir de mañá.
A campaña, titulada BuscalesUnNombre.com, pretende axudar ás empresas que utilizan todo tipo de ingredientes á hora de fabricar algo similar a unha hamburguesa a que adopten un nome diferente e creativo. Para iso, na web www.buscalesunnombre.com xa se habilitou un espazo onde calquera usuario pode propor o seu nome para este tipo de produtos. Desde os máis creativos aos máis divertidos, dos máis rompedores aos máis evidentes. A única condición é que non sexan ofensivos.
"Para nós en Provacuno, as hamburguesas deberían ser de carne de vacún, as auténticas, aínda que segundo a lexislación española pódense utilizar doutras carnes. Pero sempre teñen que ser de carne. O resto non son hamburguesas", asegurou Eliseo Isla, presidente de Provacuno, durante a presentación da campaña. "Cada vez hai máis produtos feitos en laboratorio e a base de mesturar ingredientes e ingredientes, nalgúns casos máis de 20, que queren imitar a forma, o aspecto ou, mesmo, o sabor das hamburguesas e chamarse igual. Non ten ningún sentido, cremos na interprofesional. Porque –insistiu Isla– é unha forma de confundir os consumidores nun mercado no que o respecto pola orixe dos alimentos e a súa denominación son clave".
Para axudarlles a atopar un nome a estes produtos, a campaña de Provacuno axudará a buscar centos de opcións para substituílo, desde hoxe e ata o próximo 15 de xuño. Despois, un xurado especializado será o encargado de elixir o nome perfecto para propolo á sociedade para que o adopten como alternativa á palabra "hamburguesa".
Unha campaña cun xurado experto... ata de Hamburgo
A campaña contará cun xurado que será o encargado de elixir o nome máis idóneo para elas, e que contará con voces expertas no mundo das hamburguesas:
_José Manuel Chica é chef e socio da cadea de burgers Beefcious, con 5 locais na Comunidade de Madrid, e achegará a súa experiencia á hora de elixir o nome perfecto.
_Adriane Storch é unha muller nada en Hamburgo e ela mellor que ninguén coñece os segredos das hamburguesas, polo que non podía faltar no xurado.
_Joe Burger é un auténtico devorador de hamburguesas e participou nalgúns dos retos máis importantes dos que se celebran no noso país.
_Dafne Fernández é actriz, amante da alimentación saudable, do deporte, da moda e da vida sa. E das hamburguesas, por suposto.
_E o humorista e presentador Nacho García, que achegará o seu toque de humor ao xurado. Asegura: "As hamburguesas teñen que ter sempre, sempre: pan, deliciosa carne e pan. Logo podemos porlle no medio todos os ingredientes e salsas que queiramos. Pero sempre carne, que é a clave dunha hamburguesa, estes agasallos dos deuses... de Hamburgo".
Ademais da web BuscalesUnNombre.com, a campaña inclúe un divertido anuncio no que se fai unha referencia ao que necesita unha hamburguesa para poder denominarse como tal: "Ou ben ser unha muller nada en Hamburgo, ou ben ser 100 % de deliciosa carne de vacún", e incluirá unha campaña en medios e principais plataformas online para lograr que todo o que queira poida achegar un nome para estes produtos.
Para saber máis sobre a campaña, entra en www.buscalesunnombre.com.
