A sede central de Caixa Rural Galega en Lugo acolleu o acto ao que acudiron o reitor da Universidade de Santiago de Compostela, Antonio López Díaz; o vicerreitor de Organización Académica e do Campus de Lugo, Francisco J. Fraga López; o vicepresidente da Fundación e presidente de Caixa Rural Galega, Manuel Varela López; xunto a Salvador Diz Cerviño, Alberto Cepeda Sáez e Antonio Riveira Requeijo, membros do Padroado da Fundación. Ambas partes congratuláronse por renovar este acordo de colaboración que permite incrementar a capacidade da USC para dotarse de persoal investigador, así como facilitar ás persoas graduadas a posibilidade de realizar unha actividade investigadora remunerada que permita así mesmo a obtención dun título de doutoramento.
O obxectivo da colaboración de ambas institucións é o de contribuír á promoción e mellora da actividade investigadora, o desenvolvemento e a innovación universitaria, así como a calidade da educación superior, e en xeral do avance da sociedade a través da formación de novo talento científico e tecnolóxico.
A USC será a encargada de realizar a convocatoria, así como de realizar a contratación e dar soporte á actividade investigadora do contratado. Igualmente conformará a comisión de avaliación na que participará un representante nomeado pola Fundación.
Poderán concorrer á obtención destes contratos aqueles estudantes que estean en posesión dun título universitario de grao ou equivalente e de máster universitario ou equivalente, que vaian realizar un plan de investigación nalgún dos catro eixes establecidos na convocatoria, todos eles relacionados co mundo agroalimentario e forestal e a sustentabilidade como eixe transversal. Os eixes ou áreas de investigación serán a produción vexetal e agricultura sostible, a produción e saúde animal sostible, a alimentación segura e saudable e, por último, a xestión forestal sostible.
A convocatoria está publicada na sede electrónica da USC, onde tamén se poderán presentar as solicitudes.
O prazo de presentación de solicitudes será de 15 días naturais desde a publicación da convocatoria na sede electrónica da USC.
