Do 23 ao 25 de febreiro, Santa Comba (A Coruña) acollerá o XXXII Concurso Autonómico da Raza Frisona Fefriga 2024. Esta feira sectorial, a maiores do certame, contará con zona comercial no interior do recinto, así como con máis de 2.000 m² de exposición de maquinaria agrícola no exterior. Ademais, realizaranse actividades para os máis pequenos durante toda a fin de semana.
Na tarde do venres será a quenda dos preparadores, co XVII Concurso de Novos Preparadores de Gando. O sábado, durante todo o día, celebrarase o XXXII Concurso Autonómico Fefriga 2024. O certame finalizará cos manexadores na mañá do domingo.
Esta nova edición do concurso rexional galego da raza frisona, que será avaliado polo xuíz Pol Collell, comezará o sábado ás 10.30 horas coas seccións de xatas e xovencas. Xa pola tarde, a partir das 15:00 horas, valoraranse as seccións de vacas. Todo o certame se poderá seguir en directo dende a nosa páxina web.
