A Consellería do Medio Rural publica no Diario Oficial de Galicia (DOG) a orde na que se amplía o prazo de solicitude das axudas destinadas a plans de mellora nas explotacións agrarias, á creación de empresas agropecuarias por parte de persoas mozas e ao desenvolvemento de pequenas explotacións, que contan cun orzamento global de 37,5 millóns de euros. As persoas interesadas terán de prazo ata o 11 de abril para presentar a correspondente solicitude.
Pola súa banda, as obras e construcións que necesiten da correspondente licenza municipal deberán presentar a pertinente concesión antes do 15 de setembro. O mesmo prazo establécese para o caso de investimentos que deban contar con calquera outro permiso administrativo.
Así mesmo, a orde permite que os beneficiarios que o soliciten poidan recibir anticipos de ata o 50 % da achega concedida. Estes anticipos suporán entregas de fondos con carácter previo á xustificación, como financiamento necesario para poder levar a cabo as actuacións sufragadas.
