A Consellería do Medio Rural publica hoxe a resolución no Diario Oficial de Galicia (DOG) das axudas concedidas a entidades recoñecidas como agrupacións de defensa sanitaria gandeira (ADSG) de Galicia, para os anos 2022 e 2023.
Adxudicáronse 2,15 millóns de euros a 66 agrupacións: 50 de gando bovino, 9 de porcino, 3 de aves, 2 de coellos, 1 ovino e cabruno e 1 de visóns. Ademais, a convocatoria establecía a posibilidade de que as entidades solicitasen un anticipo da axuda, polo que Medio Rural tramitou o pago de 949.850 euros.
A través destas achegas subvenciónase a contratación de técnicos veterinarios para a realización das actuacións sanitarias establecidas nos programas sanitarios, así como a adquisición do material funxible utilizado para o seu desenvolvemento. Entre as enfermidades para as que estas agrupacións crean programas de vixilancia e control atópase a rinotraquite infecciosa bovina (IBR), a diarrea vírica bovina (BDV) e a paratuberculose no gando bovino. Así mesmo, os servizos veterinarios das ADSG realizan actuacións de control de parasitos internos e externos en todas as especies.
